Алматы қаласына жұмыс сапары аясында Қазақстан Республикасы Премьер-Министрінің орынбасары Қанат Бозымбаев энергия ресурстарын есепке алу құралдарын шығаратын отандық кәсіпорындардың қызметімен танысты.
Іссапар барысында делегацияны Алматы қаласының әкімі Дархан Сатыбалды, ҚР Өнеркәсіп және құрылыс министрінің орынбасары Жаннат Дубирова, сондай-ақ «ҚазцентрТКШ» АҚ басқарма төрағасы Нұрлан Солтамбеков бастап жүрді.
Делегация «Nero Group» ЖШС өндірістік алаңдарын аралап, мұнда электр энергиясын, су, газ және жылу энергиясын есепке алу құралдарын өндіру, сондай-ақ энергия ресурстарын цифрлық мониторингтеу жүйелерін енгізу жолға қойылғанымен танысты.
NERO Group компаниялар тобы «ПИТ Алатау» АЭА резиденті болып табылады.
Кәсіпорынның өндірістік қуаттары жыл сайын:
▪️ 1,2 млн-ға дейін электр энергиясын есепке алу құралын
▪️ 1,5 млн-ға дейін су есептегіштерін
▪️ 1 млн-ға дейін газ есептегіштерін
▪️ 25 мыңға дейін жылу энергиясын есепке алу құралын шығаруға мүмкіндік береді.
Кәсіпорында 150 қызметкер еңбек етеді.
Өткен жылдың қорытындысы бойынша «NERO INDUSTRIES» ЖШС өндіріс көлемі 20 млрд теңгеге жетіп, жергіліктендіру деңгейі 70% болды. Биыл бұл көрсеткішті 95%-ға дейін арттыру жоспарлануда.
Сапар барысында кабель өнімдерін өндіруді іске қосу, сондай-ақ газ есептегіш құралдарының түрлерін кеңейту жоспарлары таныстырылды.
Сонымен қатар Energo University (АУЭС) бірлесіп Smart Energy ғылыми-білім беру кластерін құру бастамасы ұсынылды. Бұл жоба инженерлік кадрларды даярлауға және энергетика саласындағы қолданбалы зерттеулерді дамытуға бағытталған.
NERO Group Қазақстанның энергетика саласын цифрландыруға және МЭКС ұлттық жобасын іске асыруға өз үлесін қосуды жалғастырады.
